इरानले युरेनियम प्रशोधन बढाउने, संसदद्धारा कानुन पारित

१९ मंसिर, रौतहट । इरानले युरेनियम प्रशोधन बढाउनुका साथै आफ्नो परमाणु क्षेत्रको निरीक्षण गर्न राष्ट्रसंघलाई रोक्ने भएको छ । इरानको संसद्ले यससम्बन्धी कानुन पारित गरेको हो । सरकारले २० प्रतिशतसम्म युरेनियम सम्वर्द्धन गर्नुपर्ने उक्त कानुनमा व्यवस्था गरिएको छ ।

सन् २०१५ को परमाणु सम्झौतामा यदि अन्तर्राष्ट्रिय प्रतिबन्धलाई दुई महिनाभित्र खुकुलो नपारिए ३.६७ प्रतिशतले युरेनियम सम्वर्धन गर्ने सकिने प्रावधान उल्लेख थियो । संसद्ले पारित गरेको कानुन पालन गर्न अब इरान सरकारले त्यसको करिब ६ गुणा बढी युरेनियम सम्वर्द्धन गर्नुपर्नेछ ।

इरानी राष्ट्रपति हसन रौहानीले उक्त कानुन कार्यान्वयन गर्न अस्वीकार गरेका बीबीसीले जनाएको छ । इरानका वरिष्ठ परमाणु वैज्ञानिक मोहसिन फख्रिजादेहको हत्या भएपछि त्यहाँको संसद्ले यस्तो कानुन पारित गरेको हो ।

इरानको राजधानी तेहरानस्थित एक सडकमा फख्रिजादेहको रहस्यमय तरिकाले हत्या भएको थियो । उनको हत्यामा इजरायलको हात रहेको इरानको दाबी छ । इजरायलको नेतृत्वमा देशबाट निष्कासित समूहले रिमोटका माध्यमबाट चल्ने हतियार प्रहार गरी फख्रिजादेहको हत्या गरेको इरानको भनाइ छ ।

उक्त घटनाबारे भने इजरायलले हालसम्म कुनै प्रतिक्रिया जनाइसकेको छैन । इरानको परमाणु कार्यक्रममा फख्रिजादेहले महत्त्वपूर्ण भूमिका निर्वाह गरेका बताइन्छ ।