बेलायतमा कोरोनाले ज्यान गुमाउने संख्या ५२ हजार नाघे

२ मंसिर, रौतहट । बेलायतमा कोरोनाभाइरस संक्रमणबाट ज्यान गुमाउनेको संख्या सोमबार साँझसम्म ५२ हजार नाघेको छ । पछिल्लो २४ घन्टामा थप २१३ जना नयाँ कोरोना संक्रमितको मृत्यु भएको छ।

यही मृत्यु सँगै बेलायतमा कोरोनाका कारण ज्यान गुमाउनेको संख्या ५२ हजार १४७ पुगेको हो । तर मृत्यु दर्ता प्रमाणपत्रको आधारमा कोरोना संक्रमणका कारण मृत्यु भएको संख्या ६१ हजार ६४८ पुगेको छ ।

त्यस्तै बेलायतमा कोरोनाभाइरस संक्रमितको संख्या १३ लाख ९० हजार ६८१ पुगेको छ । सोमबार सांझा सार्वजनिक तथ्याँकअनुसार पछिल्लो २४ घन्टामा थप २१ हजार ३६३ जना नयाँ कोरोना संक्रमित थपिएका छन् । पछिल्लो २४ घन्टामा करिब २ लाख ८३ हजार ८६६ जनाको पीसीआर परीक्षण गरिएको थियो ।

यसैगरी थप एक हजार ८४३ जना पछिल्लो २४ घन्टामा कोरोना संक्रमित हस्पिटल भर्ना भएका छन् भने एक हजार ३५५ जनाको भेन्टिलेटर बेडमा उपचार भइरहेको स्वास्थ्य विभागले जनाएको छ । अहिले १४ हजार ९१५ जनाकोरोना संक्रमितको हस्पिटलमा उपचार भइरहेको छ ।