शीर्ष चारको होडमा लेस्टर र युनाइटेड

साउन २, रौतहट । प्रिमियर लिगको शीर्ष चारमा रहँदै अर्को सिजन च्याम्पियन्स लिग खेल्ने होडमा रहेका लेस्टर सिटी र म्यानचेष्टर युनाइटेडले पछिल्लो खेलमा जित हात पारेका छन् ।

लेस्टरले शेफिल्ड युनाइटेड र म्यानचेष्टर युनाइटेडले क्रिस्टल प्यालेसलाई समान २-० ले पराजित गरेको हो । लेस्टरका लागि आयोज पेरेज र डेमेराई ग्रे ले गोल गरे । युनाइटेडका लागि मार्कुस रासफोर्ड र एन्टोली मार्टियलले गोल गरे । जितपछि दुवै टिमले समान खेलबाट समान अंक जोडेका छन् ।

लिगमा अब दुई खेल बाँकी रहँदा लेस्टर र युनाइटेडले ३६ खेलबाट समान ६२ अंक जोडेको छ । लेस्टर गोल अन्तरमा अघि रहेर चौथो स्थानमा छ भने युनाइटेड पाँचौमा छ । ३६ खेलबाट ६३ अंकसहित चेल्सी तेस्रो स्थानमा छ ।

यी तीनमध्ये दुई टिमले अर्को सिजन च्याम्पियन्स लिग खेल्ने पक्का छ ।