कपिलवस्तुबाट साढे ७ किलो अफिमसहित दुई जना पक्राउ

१४ असोज, रौतहट । कपिलवस्तुबाट साढे ७ किलो अफिमसहित दुई जनालाई प्रहरीले पक्राउ गरेको छ ।

चन्द्रौटाबाट कृष्णनगरतर्फ आउँदै गरेको लु १ ह १५७ नम्बरको अटोमा सवार एक महिला र अटो चालकलाई साढे ७ किलो अफिमसहित पक्राउ गरिएको हो ।

मंगलबार इलाका प्रहरी कार्यालय कृष्णनगरको टोलीले चेकजाँच गर्ने क्रममा कृष्णनगर नगरपालिका वडा न. २ पिपलबोटको चेक प्वाइन्टबाट रोल्पा जिल्ला कुलेरी गाउँपालिका १ कुरेली बस्ने ४९ वर्षीया सीता रोकालाई र कपिलवस्तु जिल्ला शिवराज नगरपालिका वडा नम्बर ५ का २० वर्षीय सुशील क्षेत्रीलाई नियन्त्रणमा लिएको कपिलवस्तुका प्रहरी उपरीक्षक नवराज अधिकारीले जानकारी दिए ।

चेकजाँच गर्ने क्रममा शंका लागेपछि निजले बोकेर ल्याएको झोला चेक गर्दा साढे ७ किलो अफिम बरामद भएको अधिकारी बताए । उनले हातमा छोपेको लेडिज ब्यागमा २ किलो र चालकको सिट पछाडि राखेको रेग्जिनको झोलामा रहेको साढे ५ किलो गरी साढे ७ किलो अफिम बरामद भएको अधिकरीले बताए ।

प्रहरीले रोकासंगै अटो चालकलाई पनि नियन्त्रणमा लिई थप अनुसन्धान भईरहेको कपिलवस्तुका प्रहरी उपरीक्षक नवराज अधिकारीले जानकारी दिए ।