धनुषामा थप एक ६५ बर्षीय पुरुषको कोरोनाका कारण मृत्युु

भदौ १, रौतहट । धनुषामा थप एक जनाको कोरोना भाईरस (कोभिड १९)का संक्रमणका कारण मृत्यु भएको छ ।

धनौजी गाउँपालिका वडा नम्बर ३ कटैया निवासी ६५ बर्षीय पुरुषको प्रादेशिक अस्पताल जनकपुरमा उपचारका क्रममा मृत्यु भएको प्रदेश २ को सामाजिक विकास मन्त्रालयले जनाएको छ ।

ती पुरुष बिरामी परेर गत साउन २६ गते अस्पताल भर्ना भएको मन्त्रालयका वरिष्ठ जनस्वास्थ्य प्रशासक विजय झाले बताए । उनको सोही दिन स्वाब संकलन गरेर परीक्षणका लागि पठाइएको थियो । साउन ३१ गते रिपोर्ट आउँदा कोरोना संक्रमण पुष्टि भएको थियो ।

जटिल किसिमको निमोनियाबाट ग्रसित ती पुरुषलाई ३१ साउनकै राति सास फेर्न समस्या भएपछि आईसीयूमा भर्ना गरिएको थियो । योसँगै धनुषामा कोराना संक्रमति भएर मृत्यु हुनेको संख्या ९ पुगेको छ ।