बारामा डाँका र प्रहरीबीच गोली हानाहान हुँदा सई घाइते

१९ भदौँ, बारा । बाराको जीतपुरसिमरास्थित एरोटेक प्रालिमा लुटपाट गर्न आएका डाँका समूह र प्रहरीबीच गोली हानाहान हुदाँ वरिष्ठ सई घाइते भएका छन् ।

जीतपुरसिमरा उपमहानगरपालिका वडा नं. २३ भलुहीस्थित एरोटेक प्रालिमा लुटपाट गर्न आएका डाँका समूहले एक राउण्ड फायर गर्दा प्रहरीले ३ राउण्ड हवाई फायर गरेका थिए ।

इलाका प्रहरी कार्यालय जीतपुरका प्रमुख वरिष्ठ प्रहरी नायब निरीक्षक (वरिष्ठ सई) कलमबहादुर शाहीको कमान्डमा खटिएको टोलीले दुई जना डाँकालाई हिरासतमा लिएको हो । पक्राउ परेका दुवै जनामाथि यसबारे अनुसन्धान भईरहेको प्रहरीले जनाएको छ ।

यस्तै, घटनास्थलमा पुगेको प्रहरी टोली र डाँकासमूह बीच झडप भएको क्रममा वरिष्ठ सई शाहीका टाउकोमा डाँका समूहले फलामको रडले प्रहार गरेको प्रहरीले जनाएको छ । रड प्रहारबाट घाइते भएका शमहीलाई उपचारका लागि वीरगञ्जस्थित हेल्थ केयर हस्पिटलमा उपचार भइरहेको ईलाका प्रहरी कार्यालय जीतपुरले जनाएको छ ।