प्रतिबन्धित लागूऔषधसहित बाराबाट बसका सहचालक पक्राउ

१५ भदौँ, बारा । नाइट्राभेटसहित बाराबाट एक जना पक्राउ परेका छन् । पक्राउ पर्नेमा सिन्धुली कालापानी गाउँपालिका वडा नम्बर १ का २४ वर्षीय पूर्णप्रसाद दाहाल रहेको प्रहरीले जनाएको छ ।

वीरगञ्जबाट काठमाडौंतर्फ जाँदै गरेकोे प्रदेश २-०३-००१ ख ३६२३ नम्बरको रोयल सिंघम बसलाई रोकी चेकजाँच गर्ने क्रममा प्रतिबन्धित लागूऔषधसहित उनलाई हिरासतमा लिएको प्रहरीले जनाएको छ ।

बाराको जीतपुर सिमरा उपमहानगरपालिका १ पथलैया चोकमा बस रोकी चेकजाँच गर्ने क्रममा झोलामा लुकाईछिपाई राखेको अवस्थामा डाइजेपाम ५८८, फेनारगन ५८८, नुफिर्न ५८७ एम्पुल र नाइट्राभेट १० लेखिएको ट्याबलेट ३ सय थान बरामद भएको प्रहरीले जनाएको छ ।

जिल्ला अदालतबाट ७ दिनको म्याद थप अनुमति लिई पक्राउ परेका उनमाथि यसबारे थप अनुसन्धान भइरहेको जिल्ला प्रहरी कार्यालय बाराले जनाएको छ ।