सेन्ट इटिएनद्वारा मार्से पराजित

२ असोज, रौतहट ।  फ्रेन्च लिग वानमा सेन्ट इटिएनले लगातार तेस्रो जित निकालेको छ । बिहीबार राति भएको खेलमा मार्सेलाई २–० ले पराजित गर्दै लगातार तेस्रो जित निकालेको हो ।

इटिएनले मार्सेलाई उसकै मैदानमा हराएको हो । सेन्ट इटिनेको जितमा रोमेन हामोउमा र डेनिस बोउअंगाले गोल गरे । पहिलो र दोस्रो हाफमा समान एक गोल सम्भव भएको थियो । खेलको छैटौं मिनेटमा रोमेन हामोउमा गोल गर्दे सेन्ट इटिनेलाई अग्रता दिलाएका थिए । उनले माकोनको पासमा गोल गरेका थिए ।

७५औं मिनेटमा डेनिस बोउअंगाले अर्नाउड नोर्दिनको पासमा गोल गर्दै सेन्ट इटिनेको जित पक्का गरे । बल पोजेसनमा घरेलु टोलीले पकड बनाएपनि सेन्ट इटिनेको बलियो रक्षापङ्ति टोड्न नसक्दा मार्से पराजित हुन पुग्यो । मार्सेका लागि पीएसजीविरुद्ध खेलमा प्रतिबन्ध भोगेका डिफेन्डर जोर्डन अमाभी र डारियो बेनेडेटो उपस्थित रहेका थिएनन् ।

जितसँगै सेन्ट इटिने लिग वानको शीर्षस्थानमा उक्लिएको छ । अपराजित रहेको सेन्टको ३ खेलबाट ९ अंक पुगेको छ । पराजित मार्से ६ अंक जोडेर आठौं स्थानमा छ । साविक विजेता पीएसजी ३ अंक जोडेर १५औं स्थानमा छ ।