रानीको जन्मदिनको अवसर ‘मर्दानी–३’को घोषणा

८ चैत,

बलिउड अभिनेत्री रानी मुखर्जीले ‘मर्दानी–२’मा एकबहादुर र निडर प्रहरी अधिकारी शिवानी शिवाजीको भूमिका निर्वाह गरेर सबैको ध्यान खिचेकी थिइन्।

अहिले यही फिल्मको अर्को भाग बन्ने खबरले बलिउड गर्माएको छ। रानीको जन्मदिनको अवसर पारेर यशराज फिल्म्सले ‘मर्दानी–३’ घोषणा गर्न लागेको खबर सार्वजनिक भएको हो। २१ मार्चमा रानी आफ्नो ४२औं जन्मदिन मनाउँदै छिन्। फिल्मको निर्देशन गोपी पुत्रनले गर्नेछन्।

‘मर्दानी’ फ्रेन्चाइजीको फिल्मले रानीको करिअरमा नयाँ आयाम दिएको छ। २०१४ मा रिलिज भएको फिल्म ‘मर्दानी’ बालक तस्करी र ड्रग्सको वरिपरि घुमेको छ। फिल्मको निर्देशन प्रदीप सरकारले गरेका थिए। फिल्ममा जिसु सेनगुप्ता, ताहिर राज भसिन र सानन्द बर्माले अभिनय गरेका थिए।

‘मर्दानी–२’ २०१९ मा रिलिज भएको थियो। यसको निर्देशन गोपीले गरेका थिए। ‘मर्दानी’ सिरिजका फिल्मले बक्स अफिसमा राम्रो कमाइ गरेका थिए। रानी अहिले ‘बन्टी और बब्ली–२’का कारण चर्चामा छिन्। एजेन्सी