चितवन मिनिबस र मोटरसाइकल आपसमा ठोक्किँदा दुई जनाको मृत्यु

१३ माघ, रौतहट । चितवनमा मिनिबस र मोटरसाइकल आपसमा ठोक्किँदा दुई जनाको मृत्यु भएको छ ।

जिल्लाको रत्ननगरस्थित हरिहर मन्दिर अगाडि मिनिबस र मोटरसाइकल ठोक्किँदा मोटरसाइकलमा सवार दुई जनाको मृत्यु भएको प्रहरीले जनाएको हो ।

दुर्घटनामा परी मृत्यु भएको दुवै जनाको हाल नाम खुल्न नसकेको इलाका प्रहरी कार्यालयका प्रमुख रविन कार्कीले जानकारी दिए ।

कार्कीले दिएका जानकारी अनुसार बा २ ख ५६७४ नं. को मिनिबस पूर्वतिरबाट आइरहेको र पश्चिमबाट पूर्वतिर गइरहेको बा ९२ प ५२०४ नं.को मोटरसाइकल एक आपसमा ठोक्किँदा उनीहरु गम्भीर घाइते भएका थिए ।

घाइते भएका उनीहरूको पुरानो मेडिकल कलेज भरतपुरमा ल्याइएपनि उपचारको क्रममा मृत्यु भएको प्रहरीले जनाएको छ ।