कुस्तीको प्रशिक्षण पुनः १० महिनापछि शुरु हुने

   २४ पुष २०७७, शुक्रबार १५:१४  

२४ पुस, रौतहट । कोरोना महमारी कारण बन्द भएको कुस्तीको प्रशिक्षण पुनः १० महिनापछि शुरु हुने भएको छ । गत वर्ष चैतदेखि बन्द रहेको कुस्तीका राष्ट्रिय खेलाडीको प्रशिक्षण आगामी माघको पहिलो सातादेखि पुनः आरम्भ हुन लागेको हो ।

महामारीका कारण कुस्तीका खेलाडी अभ्यास गर्न नपाउँदा निश्क्रिय भएर बसेका छन् । कुस्ती खेलको गतिविधि बढाउन खेलाडीको प्रशिक्षण शुरु गर्न लागिएको नेपाल कुस्ती सङ्घका महासचिव विद्यासागर पोखरेलले जानकारी दिएका छन् । “कुस्तीमा सामाजिक दूरी कायम गर्न सहज नहुँदा अन्य खेलको भन्दा प्रशिक्षण ढिला शुरु हुन लागेको हो”, उनले बताए ।

स्वास्थ्य सुरक्षाको मापदण्ड अपनाएर नै खेलाडीलाई प्रशिक्षण दिइने पोखरेलले बताएका छन् । कुस्तीमा नेपालले १३औँ दक्षिण एशियाली खेलकूद ९साग०मा महिलातर्फ एउटा मात्र स्वर्ण पदक जितेको थियो । नेपालका लागि सो पदक सङ्गीता धामीले जितेकी थिइन् ।