सुनको मूल्यले बनायो नयाँ रेकर्ड

२० साउन, काठमाडौं । नेपाली बजारमा सुनको मूल्यले नयाँ ऐतिहासिक रेकर्ड कायम गरेको छ। नेपाल सुनचाँदी व्यवसायी महासंघका अनुसार, मंगलबार सुन प्रतितोला एक लाख ९८ हजार ५०० रुपैयाँमा कारोबार भएको छ, जुन अहिलेसम्मकै सर्वाधिक उच्च मूल्य हो।

यसअघि, वैशाख ९ गते सुनको मूल्य प्रतितोला एक लाख ९७ हजार ९०० रुपैयाँ पुगेको थियो। आजको मूल्यले सो रेकर्ड तोड्दै नयाँ कीर्तिमान बनाएको हो।

सोमबारको तुलनामा आज सुनको मूल्यमा १,९०० रुपैयाँको वृद्धि भएको छ। सोमबार सुन प्रतितोला एक लाख ९६ हजार ६०० रुपैयाँमा कारोबार भएको थियो।

सुनसँगै चाँदीको मूल्यमा पनि वृद्धि भएको छ। मंगलबार चाँदी प्रतितोला दुई हजार २८० रुपैयाँमा कारोबार भइरहेको छ, जुन सोमबारको मूल्य दुई हजार २५५ रुपैयाँ भन्दा २५ रुपैयाँले बढी हो।