परिमाणात्मक बन्देज लगाउन मन्त्रालयको प्रस्ताव

२० असोज, रौतहट । सुपारी, छोकडा र मरिचमा परिमाणात्मक बन्देज लगाउने सरकारले तयारी गरेको छ ।

उद्योग वाणिज्य तथा आपूर्ति मन्त्रालयले चालु आर्थिक वर्षका लागि आयात गर्ने ति वस्तुमा कोटा नै निर्धारण गरेर प्रतिबन्ध तयारी गरिएको जनाएको छ ।

पाँच हजार मेट्रिकटन छोकडा, १५ हजार मेट्रिकटन सुपारी र १५ हजार मेट्रिकटन दाना मरिच मात्रै ल्याउन पाउने गरी मन्त्रिपरिषदमा प्रस्ताव पठाइएको मन्त्रालयले जनाएको छ ।

कोरोना भाइरस (कोभिड १९) संकटकाबीच व्यापार घाटा न्युनीकरण गर्न यस्तो निर्णय गरिएको मन्त्रालयले जनाएको छ । ‘मन्त्रालयले प्रस्ताव पठाएको छ, मन्त्रिपरिषद्ले के निर्णय गर्छ अब पर्खन्छौँ,’ स्रोतले भन्यो ।

यसअघि सरकारले गत चैत १६ गते मरिच, छोकडा, सुपारी र केराउको दाना आयातमा प्रतिबन्ध लगाएको थियो । तर, व्यापारीको तीब्र लबिङपछि भदौ १५ गते सरकारले नाकामा रोकिएका मरिच र केराउको प्रतिबन्ध फकुवा गरेको थियो ।