नेपालमा थप ८ सय १८ जनाको कोरोना रिपोर्ट पोजेटिभ

भदौ ७, रौतहट । नेपालमा बितेको २४ घण्टामा थप ८ सय १८ जनामा कोरोना भाईरसको संक्रमण पुष्टि भएको छ । योसंगै देशभर कोरोनाबाट संक्रमित हुनेको कुल संख्या ३१ हजार ९ सय ३५ पुगेको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले दिएका जानेकारी अनुसार पछिल्लो २४ घण्टामा ८ सय १८ जना संक्रमित थपिएका हुन् । विगत २४ घण्टामा ८ हजार २६ जनाको पिसिआर परीक्षण भएको छ । मन्त्रालयका अनुसार हालसम्म ६ लाख ४ सय ४४ जनाको पिसिआर परीक्षण भएको छ ।

यस्तै विगत २४ घण्टामा २ सय ८१ जनाले कोरोना जितेर घर फर्किएका छन् । यीसहित नेपालमा हालसम्म १८ हजार ६ सय ३१ जना कोरोना मुक्त भएका छन् ।

त्यस्तै विगत २४ घण्टामा थप ३ जना मृतकमा कोरोना पुष्टि भएको छ । थप मृत्यु हुनेमा झापाका ५८ वर्षीय पुरुष, पर्साकी ५६ वर्षीया महिला र सर्लाहीकी ३३ वर्षीया महिला छन ।

हालसम्म १ सय ४९ जनाको कोरोनाबाट मृत्यु भएको मन्त्रालयले जनाएको छ ।

यस्तै अब देशका विभिन्न अस्पताल तथा होम आइसोलेसनमा १३ हजार १ सय ५५ सक्रिय संक्रमित छन ।