पञ्चमी नुहाउन गएकी एक महिलाको खोलामा बगेर मृत्यु

भदौ ७, रौतहट । कास्कीमा पञ्चमी नुहाउँन गएकी एक महिलाको खोलामा बगेर मृत्यु भएको छ । कास्कीको माछापुच्छे गाउँपालिका ९ मा कस्युङ खोलामा पञ्चमी नुहाउन गएकी एक महिलाको बगेर मृत्यु भएको छ ।

आज बिहान २४ वर्षीया दीपा गौतमलाई हरितालिका तीजको पञ्चमी नुहाउन सो खोलामा जाँदा बगेकोे र चार घण्टापछि मृतावस्थामा फेला पारिएको वडाध्यक्ष दुर्गाबहादुर क्षेत्रीले जानकारी दिए । कालीमाटी र नागीका बीचबाट बगेर मर्दीमा कस्युङ खोला मिसिएको छ ।

खोलाले बगाएपछि स्थानीयवासीले खोजतलासका क्रममा गौतमको शव घटनास्थलबाट अन्दाजी ७०० मिटर तल नदी किनारमा फेला पारेका बताए ।

घटनालगत्तै प्रहरीचौकी घाचोकबाट प्रहरी घटनास्थलमा परिचालन गरिएको जिल्ला प्रहरी कार्यालयले जनाएको छ । पोखरा–२४ कास्कीकोट माइती भएकी गर्भवती उनकी साढे दुई वर्षकी एक छोरी पनि छन ।