६ लाख ४० हजार सहित दुई भारतीय महिला पक्राउ

भदौ ३, रौतहट ।  प्रहरीले श्रोत नखुलेको ६ लाख ४० हजार रकम सहित  २  भारतीय महिलालाई  पक्राउ गरेको छ ।

उनीहरुलाई गौर नगरपालिका वडा नं. ३ महादेवपट्टीबाट पक्राउ गरिएको हो । अस्थायी प्रहरी पोष्ट महादेवपट्टीबाट प्रहरी सहायक निरिक्षक मनोज कुमार सिहंको कमाण्डमा खटिएको प्रहरी टोलीले  रकमसहित दुई भारतीय महिलालाई पक्राउ गरेको जिल्ला प्रहरी कार्यालय रौतहटले जनाएको छ ।

भारतको विहार राज्य जिल्ला सितामढी बैरगनिया ग्राम पन्चायत वडा नम्बर १ सिन्दुरीयाकी ४५ वर्षीय शान्तीदेवी र सोही स्थान बस्ने ४५ वर्षीय मिनादेवी पक्राउ परेको जिल्ला प्रहरी कार्यालाय रौतहटका प्रमुख प्रहरी उपरिक्षक रविराज खड्काले बताए ।

पक्राउ परेकी महिलाहरुले प्रहरीको आँखा छलेर घाँस काट्ने बहानाले नेपाल प्रवेश गर्न खोजेका खड्काले बताए ।