रौतहटका एक युवकको कोरोना संक्रमणबाट  मृत्यु

२०७७ असार ३१, रौतहट। कोरोना भाइरस (कोविड १९) संक्रमणका कारण रौतहटका एक युवककको मृत्यु भएको छ । भारतको बैंगलोर बाट फर्किएर अस्पताल भर्ना भएका ३६ वर्षिय पुरुषको आज मृत्यु भएको हो ।

रोजगारीको सिलसिलामा भारतको बैंगलोर पुगेका रौतहट को परोहा नगरपालिका ६ नरकटिया टोलका एक व्यक्तिको उपचारको क्रममा वीरगंजको गण्डक अस्पतालमा मृत्यु भएको हो । बैंगलोरमा ज्याला मजदुरीको काम गर्ने गरेका ती व्यक्तिको भाइको पनि कोरोना संक्रमणकै कारण भारतमै मृत्यु भए पछि उनी गत असार २४ गते रौतहट फर्किएका थिए ।

भारतीय सिमा क्षेत्रबाट रौतहट आइपुगेका उनलाई सिमाना बाटै एम्बुलेन्समा राखेर परोहाको तेजापाकडमा रहेको क्वारेन्टीनमा पु¥याइएको थियो । क्वारेन्टीनमा रहेका उनको असार २८ मा स्वाब संकलन गरेर परिक्षणको लागी पठाइएको थियो । “स्वाब नमूना पठाएको भोली पल्ट बाटै उनमा कोरोना संक्रमणको लक्षण देखिए पछि हामीले थप उपचारका लागी वीरगंज पठाएका थियौं ।” परोहाका स्वास्थ्य संयोजक जलन्धर प्रसाद यादवले भने “असार २९ मा उनलाई अस्पताल पठाएका थियौ, आज बिहान उनको रिपोर्ट पोजेटिभ आएको थियो ।” सिमाना बाट सिधै क्वारेन्टीनमा ल्याएको उनको परिवारजन वा अन्य कोही सँग भेटघाट भएको थिएन ।

मृतकका १ छोरा र ४ छोरी रहेको वडा अध्यक्ष रघुनाथ प्रसाद कलवारले बताए । आर्थिक अवश्था कमजोर रहेको परिवारका चार दाजु भाइ मध्ये दुई जनाको कोरोनाकै कारण मृत्यु भए पछि परिवारजनको बिचल्ली भएको उनले बताए । “भारत कमाउन गएका दुई जना दाजुभाईको कोरोनाकै कारण ज्यान गयो ।” वडाअध्यक्ष कलवारले भने “परिवारमा अब श्रीमती, छोराछोरी, बुवा आमा र दुई भाइ छन । दुई भाइ मध्ये एक जना अपाङ्ग रहेकोले परिवारको अवश्था झनै नाजुक बनेको छ ।”

भारतमै मृत्यु भएका एक छोराको अनुहार सम्म हेर्न नपाएका परिवारजनलाई घर फर्किएका जेठो छोराको वीरगंजमा उपचारको क्रममा मृत्यु भएको खबरले स्तब्ध बनाएको छ ।