मेयर–११ लाई हराउँदै पुलिस क्लब फाइनमा

२६ फागुन, रौतहट । नेपाल पुलिस क्लब काठमाडौं मेयर कप–२०७७ एकदिवसिय क्रिकेट लिगको फाइनलमा पुगेको छ । पुलिसले बुधबार आफ्नो लिग चरणको अन्तिम खेलमा काठमाडौं मेयर–११ लाई १ सय ३ रनको फराकिलो अन्तरले हराउँदै लिगमा शीर्ष दुईमा रहँदै फाइनलमा आफ्नो स्थान पक्का गरेको हो ।

जितको लागि १ सय ९८ रनको मध्यम विजयी लक्ष्य पछ्याएको मेयर–११ ले ३१.२ ओभरमा ९४ रनमा अल आउट भयो ।

मेयर ११ का कप्तान सन्दीप लामिछानेले सर्वाधिक २६ रन बनाउन बाहेक अन्य कुनैपनि ब्याट्सम्यानले राम्रो प्रर्दशन गर्न सकेनन् । स्पिनर सागर ढकालको दोस्रो ओभरको पाँचौं बलमा ठूलो सट खेलेका ओपनर हरि शंकर शाह दीपेन्द्रसिंह ऐरीबाट शून्यमा क्याच आउट हुन पुगे ।

त्यसअघि टियु क्रिकेट मैदानमा टस हारेर पहिला ब्याटिङ थालेको पुलिस ४७.४ ओभरमा १ सय ९७ रनमा अल आउट भएको थियो ।

आर्मी, बागमती र मेयर ११ समान ३ खेलमा समान नतिजाका साथ २ मा हार र १ मा जित सहित २ अंकका साथ नेट रनरेटको आधारमा क्रमशः तेस्रो, चौथो र पाँचौं स्थानमा छन् ।