गौर कारागारबाट भागेका ५२ कैदिबन्दी पक्राउ

२६ भदौ, रौतहट । रौतहट कारागारबाट भागेका कैदीहरुलाई प्रहरीले पक्राउ गर्न थालेको छ ।

मंगलबार राति हुलहुज्जत गरेर गौर कारगारबाट भागेका मध्ये ५२ जनालाई प्रहरीले नियन्त्रणमा लिएर पुनः कारागार पठाएको छ । कुल २९१ कैदिबन्दी रहेको गौर कारागारमा २४ जना बाहेक सबै कारागार तोडफोड गरी भागेका थिए ।

भागेका मध्ये ३५ जनालाई सुरक्षाकर्मीले रौतहटका विभिन्न स्थानबाट नियन्त्रणमा लिएको प्रमुख जिल्ला अधिकारी विनोद खडकाले बताए । यसैगरी कारागारबाट भागेका १७ जना कैदीलाई भारतीय सुरक्षाकर्मीले सिमाक्षेत्रमा पक्राउ गरी रौतहट प्रशासनको जिम्मा लगाएको सिडिओ खडकाले बताए ।

भागेका मध्ये २ जना महिला र बाँकी पुरुष कैदी रहेका छन । फरार कैदीहरुलाई सम्पर्कमा आउन समेत सिडिओ खडकाले अपील गरेका छन । “कारागारबाट फरार भएका कैदीहरुलाई आफ्नो गाँउठाँउमा देखे प्रहरीलाई तत्काल खबर गरीदिनुहुन हामीले अनुरोध गरेका छौं ।” प्रमुख जिल्ला अधिकारी खडकाले भने “कैद भुक्तान गर्न बाँकी रहेका कैदीहरुका कारण अपराधका घटना बढन सक्ने भएकोले समुदायका सबैले यसलाई नियन्त्रण गर्न हातेमालो गर्न आवश्यक छ ।”

सबै सुरक्षाका अंगहरुलाई परिचालन गरेर भागेकाहरुको खोजतलासको क्रम तिव्र बनाइएको सिडिओ खडकाले बताए ।