फेसबुकमा सुसाइड नोट लेखेर बेपत्ता भएका डा. दिगम्बर झा काभ्रेमा सकुशल भेटिए
२५ कार्तिक, रौतहट । भक्तपुरको द डेन्टल सिटी अस्पतालका निर्देशक समेत रहेका डा. दिगम्बर झाले फेसबुकमा सुसाइड नोट पोस्ट गरेर आज बिहानदेखि बेपत्ता भएका चिकित्सक काभ्रेबाट भेटिएका छन् ।
उनले मंगलबार बिहान करिब ७ बजेतिर फेसबुकमा आफू आत्महत्या गर्न गएको भन्दै लामो सुसाइड नोट समेत पोस्ट गरेका बेपत्ता भएका थिए । बिहान ५ बजेतिर निस्किएका उनको खोजीमा प्रहरी लागेको थियो ।
आज दिउँसो काभ्रेको ५५ किलो भन्ने ठाउँमा भेटिएको महानगरीय प्रहरी परिसर भक्तपुरकी एसपी तारादेवी थापाले जानकारी दिइन् । उहाँ सकुशल फेला पर्नु भएको छ । काभ्रेबाट टोलीले भक्तपुर ल्याउँदैछ, एसपी थापाले बताए ।
सुसाइड नोटमा उनले आफू परिवारका कारण आत्महत्या गर्न बाध्य भएको बताएका छन् । प्रहरीको प्रारम्भिक अनुसन्धानमा पनि उनको पछिल्लो समय घर परिवारसँगको सम्बन्ध राम्रो नभएको खुलेको छ ।
बिहान ५ बजेतिर घरबाट निस्किएका उनको मोबाइलको अन्तिम लोकेसन भने काभ्रेको पनौतीमा देखिएको थियो । त्यसपछि भने उनको मोबाइल अफ भएको थियो ।
झाको खोजीमा भक्तपुरसहित काभ्रे प्रहरी समेत परिचालन गरिएको थियो ।