बिहीबार थप २३६४ जनामा कोरोना पुष्टि, ३०३८ संक्रमणमुक्त

१३ कार्तिक, रौतहट । नेपालमा पछिल्लो २४ घण्टामा थप २ हजार ३ सय ६४ जनामा कोरोना भाइरस (कोभिड १९)का संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बिहीबारको नियमित प्रेस ब्रिफिङमा दिएका जानकारी अनुसार बितेको २४ घण्टामा ९ हजार ७ सय ६९ जनाको पीसीआर परीक्षण गर्दा २ हजार ३ सय ६४ जनाको कोरोना रिपोर्ट पोजेटिभ आएको हो । योसंगै हालसम्म देशभर कोरोना संक्रमितको कुल संख्या १ लाख ६४ हजार ७ सय १८ पुगेको डा. गौतमले बताए ।

यस्तै,पछिल्लो २४ घण्टामा थप ३ हजार ३८ जनाले कोरोना जितेर डिस्चार्ज भएका छन्, भने यससंगै हाल नेपालमा कोरोनामुक्त हुनेको कुल संख्या १ लाख २४ हजार ८ सय ६२ पुगेको छ ।

त्यस्तै, हाल नेपालमा संक्रिय कोरोना संक्रमितको कुल संख्या ३८ हजार ९ सय ५२ रहेको मन्त्रालयले जनाए ।

यसैबीच विगत २४ घण्टामा कोरोनाका कारण थप १७ जनाले ज्यान गुमाएका छन्, भने योसंगै कोरोना संक्रमणबाट मृत्यु हुनेको कुल संख्या ९ सय ४ पुगेको छ ।

त्यसैगरी पछिल्लो २४ घण्टामा काठमाडौँ उपत्याकामा थप १ हजार ६ सय १५ जनामा कोरोना संक्रमण पुष्टि भएको छ ।

जसमध्ये काठमाडौँमा १ हजार ३ सय ३८, ललितपुरमा १ सय ८० र भक्तपुरमा ९७ जना नयाँ कोरोना संक्रमित थपिएका छन् ।