चौरसियाको हत्यारालाइ कानुनी कारवाही हुन्छ : प्रदेश अध्यक्ष साह

१२ कार्तिक, रौतहट ।

नेपाल कम्युनिष्ट पार्टी प्रदेश २ का अध्यक्ष प्रभु साहले पर्साको विन्दवासिनी गाउँपालिका कमिटी सचिव मुकेश चौरसियाको हत्यारालाइ कानुनी कारवाही हुनु पर्ने बताए ।

बुधवार रौतहटको गुजरा नगरपालिका-४, जंगलसैयामा आयोजित कार्यक्रममा बोल्दै अध्यक्ष साहले मुकेश चौरसियाको वास्तविक हत्यारालाई कसैले बचाउन नसक्ने जिकिर गरे । पार्टीको आन्तरिक विवादको कारण नेताले ज्यान गुमाउनुपर्ने स्थिति आउनु दु:खद भएको बताउदै अध्यक्ष साहले पानी मुनि गएपनि अपराधी बच्न नसक्ने र कोही निर्दोषलाई फस्न नदिने बताए ।

पार्टी प्रदेश कमिटीले विवादित कार्यक्रम नगर्न निर्देश दिएपनि जबरजस्ती कार्यक्रम गरेकोमा अध्यक्ष साहले दुख व्यक्त गरे । “पर्साको जिल्लाको विन्दवासिनी गाउँपालिकामा विवादका कारण गाउँ कमिटी सचिव कमरेड मुकेश चौरसियाको निधन भएको कुरा यहाँहरुलाई जानकारी भएकै विषय हो । प्रदेश कमिटीले कुनै पनि विवादित कार्यक्रम नगर्न भने पनि त्यसको ठिक विपरीत कार्यक्रम हुनु र त्यसमा पनि नेताले ज्याउन गुमाउनुपर्ने यो स्थिति दु:खद हो ।

प्रहरी प्रशासनले मुकेशको हत्या भएको यति दिन भइसक्दा पनि जाहेरी दर्ता नगर्नु त्यसभन्दा दु:खद कुरा हो ।  जघन्य अपराधको विषयमा राज्य संवेदनहीन भएर प्रस्तुत हुन मिल्दैन । ” अध्यक्ष साहले भने, “तर म स्पष्ट पार्न चाहन्छु कि अब कमरेड मुकेशको हत्याको जाहेरी दर्ता हुन्छ । उहाँको हत्यारा पानीमुनि गएर लुकेपनि कसैले बचाउन सक्दैन । र कोही पनि निर्दोषलाई फसाउने मनसाय पनि पूरा हुन दिन्नौ। हामी सोही अनुसार छलफलमा छौँ ।”

“पार्टीभित्रको आन्तरिक विवादको कारण त्यस्तो भएको हो भनेर भनिएको छ । हामी छलफलमा छौँ । अबको दुई तीन दिनभित्र यसको हल निस्किन्छ । तर मृतकको लास त्यस्तै राख्ने काम ठिक हुँदैन । राज्य पक्षले यसको संवेदनशीलता बुझ्नु जरुरी छ ।” उनले थपे । गाउँ कमिटीको सपथ ग्रहण कार्यक्रममा झडप हुँदा घाइते भएका मुकेश चौरसियाको उपचारको क्रममा मृत्यु भएको थियो ।