आइतबार थप २९४२ जनामा कोरोना संक्रमण पुष्टि, सक्रिय संक्रमित ३९,३४१ पुगे

२ कार्तिक, रौतहट । नेपालमा पछिल्लो २४ घण्टामा थप २ हजार ९ सय ४२ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आइतबारको नियमित प्रेस ब्रिफिङमा दिएका जानकारी अनुसार बितेको २४ घण्टामा १५ हजार ८ सय ७५ जनाको पीसीआर परीक्षण गर्दा २ हजार ९ सय ४२ जनाको कोरोना रिपोर्ट पोजेटिभ आएको हो । योसंगै हालसम्म देशभर कोरोना संक्रमितको कुल संख्या १ लाख ३२ हजार २ सय ४६ रहेको गौतमले बताए ।

हाल नेपालमा संक्रिय कोरोना संक्रमितको कुल संख्या ३९ हजार ३ सय ४१ पुगेको छ । जसमध्ये संस्थागत आइसोलेशनमा १२ हजार ९ सय ३३ र होम आइसोलेशनमा २६ हजार ४ सय ८ जना रहेको छन् ।

यस्तै, पछिल्लो २४ घण्टामा थप २ हजार ३ सय २६ जनाले कोरोना जितेर डिस्चार्ज भएका छन्, भने हालसम्म नेपालमा कोरोनामुक्त हुनेको कुल संख्या ९२ हजार १ सय ६६ पुगेको मन्त्रालय ले जनाएको छ ।

त्यसैगरी पछिल्लो २४ घण्टामा थप १२ कोरोना संक्रमितको मृत्यु भएको छ, भने कोरोनाका काराण नेपालमा मृत्यु हुनेको कुल संख्य ७ सय ३९ पुगेको छ ।

यसैबीच, पछिल्लो २४ घण्टामा पीसीआर १४ हजार ८ सय ७५ जनाको भएको छ, भने काठमाडौँमा १ हजार ४ सय ६९, ललितपुरमा १ सय ३० र भक्तपुरमा ९९ जना गरी उपत्यकामा कुल १ हजार ६९८ जनामा संक्रमण पुष्टि भएको छ ।