कपिलवस्तुबाट भारततर्फ लैजाँदै गरेको आधा किलो सुनसहित युवक पक्राउ

१६ असोज, रौतहट । कपिलवस्तुबाट आधा किलो अवैध सुन भारततर्फ लैजाँदै गरेको एक युवकलाई प्रहरीले पक्राउ गरेको छ । बिहीबार साँझ प्रहरीले अवैध सुनसहित ३४ वर्षीय पवनकुमार गुप्तालाई पक्राउ गरेको हो ।

जिलला प्रहरी कार्यालय का प्रहरी उपरीक्षक नवराज अधिकारीले दिएका जानकारी अनुसार लु ५६ प ६३१० नम्बरको मोटरसाइकलमा भारततर्फ जाँदै गर्दा मायादेवी गाउँपालिका ७ बनकसियामा गुप्ताको साथबाट आधा किलो सुन बरामद गरिएको छ ।

गुप्ताले कम्मरमा बाँधेको नीलो रङको थैलीभित्र २४ क्यारेट सुन ४३ तोला, १८ क्यारेट सुनको सिक्री एक तोला ४७ लाल, १८ क्यारेट सुनको औँठी बरामद गरिएको प्रहरी उपरीक्षक अधिकारीले जानकारी दिए ।

सुनको बजार मूल्य रु ४२ लाख तीन हजार ९६ रहेको प्रहरीको भनाइ छ । गुप्तालाई नियन्त्रणमा लिई थप अनुसन्धानका लागि राजस्व अनुसन्धान कार्यालय बुटवल रुपन्देही पठाइएको प्रहरीले जनाएको छ ।