गौशालाका एक प्रहरी जवान करणी गरेको अभियोगमा पक्राउ

२२ भदौ, रौतहट । जबरजस्ती युवतीलाई करणी गरेको अभियोगमा एक जना प्रहरी कर्मचारी पक्राउ परेका छन् । दार्चुला घर भइ महानगरीय प्रहरी वृत्त, गौशालामा कार्यरत प्रहरी जवान उपेन्द्रसिंह पक्राउ परेका छन् ।

२१ वर्षीया युवतीले दिएको किटानी जाहेरीका आधारमा थिङलाई पक्राउ गरिएको गौशालाका प्रहरी नायक उपरीक्षक (डीएसपी) जितेन्द्र बस्नेतले बताए । ‘अहिले म्याद थप गर्न पठाएका छौं’, बस्नेतले भने । प्रहरी जवान थिङले आइतबार वनकालीस्थित घरमै आएर आफूलाई बलात्कार गरेको पीडित युवतीको दाबी छ ।

जाहेरी दर्ता भएपछि प्रहरीले उनको स्वास्थ्य परीक्षण समेत गराएको छ । अनुसन्धानमा संलग्न अधिकृतहरुका अनुसार जवान र पीडित भनिएको युवतीबीच पहिल्यैदेखि चिनजान रहेको पाइएको छ । तर, दुईबीचको सम्बन्धबारे विस्तृतमा खुलिसकेको छैन ।

म्याद थप गरेपछि बयान लिने प्रहरी तयारी छ ।