नेपालमा थप १३५९ जनामा कोरोना संक्रमण पुष्टि

१९ भदौ, रौतहट । नेपालमा पछिल्लो २४ घण्टामा थप १३ सय ५९ जनामा कोरोना संक्रमण पुष्टि भएको छ । आज थपिएका संक्रमितहरुमध्ये महिला ४ सय ६४ र पुरुष ८ सय ९५ रहेका छन । यससँगै देशभर कुल कोरोना संक्रमितको संख्या ४४ हजार २ सय ३६ पुगेको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए ।

यस्तै, काठमाडौं उपत्यकामा मात्रै ४ सय ५४ जनामा कोरोनाभाइरस संक्रमण पुष्टि भएको छ । गौतमले काठमाडौंमा ३ सय ८६, ललितपुरमा ३२ र भक्तपुरमा ३६ जनामा कोरोना संक्रमण पुष्टि भएको जानकारी दिए । यसअघि बिहीबार उपत्यकामा ४ सय ४५ जनामा कोरोना संक्रमण पुष्टि भएको थियो ।

यस्तै देशभर सक्रिय संक्रमितको संख्या १८ हजार ७ सय ४ रहेको छ । जसमा संस्थागत आइसोलेशनमा १० हजार ९४२ जना रहेका छन्, भने होम आइसोलेशनमा ७ हजार ४६२ जना रहेका छन । यस्तै पछिल्लो २४ घण्टामा १ हजार ३ सय ५४ जना निको भएर डिस्चार्ज भएका छन्, भने कुल निको हुनेको संख्या २५ हजार ५ सय ६१ पुगेको छ ।

त्यस्तै बितेको २४ घण्टामा थप १४ जनाको कोरोना संक्रमणका कारण मृत्यु भएको छ, योसंगै नेपालमा कोरोनाबाट मृत्यु हुनेहरुको कुल संख्या २ सय ७१ पुगेको छ ।