जग्गा नाप्ने विषयमा दुई पक्षबीच कुटपिट, एक जनाको मृत्यु

२४ जेठ, बारा । जग्गा नाप्ने विषयमा बाराको आदर्श कोतवाल गाउँपालिकामा दुई पक्षबीच झडप हुँदा एक जनाको मृत्यु भएको छ ।

जिल्लाको गाउँपालिकाको वडा नम्बर ६ पटेर्वामा जग्गा नाप्ने विषयमा भएको विवाद चर्काेपछि दुवै पक्षबीच कुटपिट हुँदा प्रभुप्रसाद कुशवाहाको मृत्यु भएको प्रहरीले जनाएको छ ।

सोमबार दिउँसो कुटपिटका क्रममा गम्भीर घाइते भएका प्रभुप्रसादलाई उपचारका लागि वीरगञ्जस्थित नेशनल मेडिकल कलेजमा ल्याएपनि उपचारकै क्रममा हिजो गएराति ९:३० बजेतिर मृत्यु भएको बाराका प्रहरी प्रवक्ता राजेश थापाले जानकारी दिए ।

कुटपिटमा संलग्न भएका स्थानीय किशोरी कुशवाहा र रामप्रवेश महतोलाई पक्राउ गरी घटनाबारे अनुसन्धान भइरहेको जिल्ला प्रहरी कार्यालय बाराले जनाएको छ ।

मृतकको शव पोष्टमार्टमको लागि सोही अस्पतालमा राखिएको छ । यस्तै, कुटपिटमा घाइते भएका अन्य दुई जनाको उपचार भइरहेको छ ।