सर्लाहीमा मोटरसाइकल जलाएको आरोपमा एक जना पक्राउ

१ चैत, रौतहट । सर्लाहीमा आफ्नै दाइको मोटरसाइकल जलाएको आरोपमा भाइलाई प्रहरीले पक्राउ गरेको छ ।

जिल्लाको ईश्वरपुर नगरपालिका ६ बयलबास बस्ने मुस्तुफा अन्सारीको प्र २-०३-०१२ प २६०३ नम्बरको २२० सिसी पल्सर मोटरसाइकल शुक्रबार गएराति करिब १ बजेतिर घरबाटै चोरी गरी नजिकैको विद्यालय प्राङ्गणमा जलाएको आरोपमा एैसान अन्सारीलाई प्रहरीले नियन्त्रणमा लिएको हो ।

१६ वर्षीय एैसानले आपसी विवादकै कारण मुस्तुफाको घरमा राखिएको मोटरसाइकल निकालेर विद्यालयमा लगी आगो लगाइ जलाएका थिए ।

शुक्रबार राति नै पूर्ण रुपमा मोटरसाइकल जलाए फरार भएका एैसानलाई आज बिहान पक्राउ गरिएको सर्लाही प्रहरीले जनाएको छ । प्रहरीका अनुसार एैसान मुस्तुफाका आफ्नै काकाका छोरा हुन् ।

सर्लाहीका प्रहरी प्रवक्ता मदन कुँवरका अनुसार पक्राउ परेक एैसानले मोटरसाइकल जलाएको स्वीकार गरेका छन् । उनलाई हिरासदमा राखी यसबारे थप अनुसन्धान भइरहेको प्रहरीले जनाएको छ ।