नेपालमा थप २७० जनामा कोरोना पुष्टि, मृतकको संख्या २ हजार नाघ्यो

११ माघ, रौतहट । नेपालमा पछिल्लो २४ घण्टामा थप २ सय ७० जनामा कोरोना भाइरस (कोभिड १९)का संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आइतबारको नियमित प्रेस ब्रिफिङमा दिएका जानकारी अनुसार आज २ सय ७० जनाको कोरोना रिपोर्ट पोजेटिभ आएको हो ।

योसँगै हालसम्म देशभर कोरोना संक्रमितको कुल संख्या २ लाख ६९ हजार ४ सय ५० पुगेको डा. गौतमले जनाएको छ । जसमध्ये हाल नेपालमा संक्रिय कोरोना संक्रमितको कुल संख्या ३ हजार ३ सय १२ रहेको छ ।

यस्तै, बितेको २४ घण्टामा थप ४ सय ३ जनाले कोरोना संक्रमण जितेर डिस्चार्ज भएसंगै हालसम्म नेपालमा कोरोनामुक्त हुनेहरुको कुल संख्या २ लाख ६४ हजार १ सय ३७ पुगेको छ ।

त्यस्तै, पछिल्लो २४ घण्टामा कोरोनाका कारण थप ७ जनाको मृत्यु भएको छ । योसँगै नेपालमा कोरोनाबाट ज्यान गुमाउनेहरुको कुल संख्या २ हजार १ पुगेको छ ।