विद्यालयका सुरक्षा गार्ड मृत अवस्थामा फेला

१ माघ, रौतहट । भक्तपुरको सुर्यविनायक नगरपालिका ९ पलासेस्थित गणेश बाल विकास स्कुल नजिकैको खोल्सामा घोप्टो परेको अवस्थामा विद्यालयका एक सुरक्षा गार्डको शव फेला परेको छ ।

मृत अवस्थामा सिन्धुपाल्चोक पाँचपोखरी थाङपाल गाउँपालिका वडा नम्बर ५ घर भएका ४५ वर्षीय साइला श्रेष्ठ भन्ने लक्ष्मीदास श्रेष्ठ रहेका प्रहरीले जनाएको हो ।

महानगरीय प्रहरी वृत जागातीको टोलीले बिहिबार राति करिब ८ बजेतिर मृत अवस्थामा शव फेला परेको महानगरीय प्रहरी परिसर भक्तपुरका डिएसपी दिपक गिरीले जानकारी दिए ।

उनी दिउँसोको समयमा ज्याला मजदुरीको काम गर्ने र रातको समयमा गणेश बाल विकास स्कुलमा सुरक्षा गार्डको काम गर्ने गरेको खुलेको छ ।

यसघटना बारे थप अनुसन्धान गर्न शवलाई पोष्टमार्टको लागि काठमाडौं मेडिकल कलेज दुवाकोट लगिएको डिएसपी गिरीले जनाएका छन् ।